Plantilla:Manifiesto/ast
Manifiesto
Asturianu · Català · English · Español · Euskara · Galego El próximu 22 de mayu, los ciudadanos españoles tán convocaos a les urnes pa votar a los sos representantes públicos en tolos conceyos y en dellos parlamentos autonómicos. Los representantes escoyíos van tener al so cargu la xestión de miles de millones d'euros por un periodu de cuatro año, razón demás pa estremar les precauciones de los votantes: a lo llargo de los últimos años, el nivel de corrupción na política española disparóse sobre manera en tol arcu parlamentariu.
PSOE, PP y CiU son les tres formaciones polítiques que pautaron pa resucitar la Llei Sinde nel Senáu, una llei que dexa censurar Internet per vía alministrativa, ensin intervención xudicial que garantice la tutela efeutiva de los ciudadanos. Al xuez que tenga que facer válidu el piesllu va ta-y vedáu l’analizar el fondu del asuntu, esto ye, l’atropellu nos derechos de propiedá intelectual o la posibilidá de producir un perxuiciu patrimonial por parte d’esa páxina web que se solicita zarrar. La Llei Sinde crea un “furacu llibre de xueces” onde la decisión tómala una comisión alministrativa nomada pol gobiernu, pa evitar lo qu'hasta entós venía asocediendo: que los xueces nun daben la razón a les reclamaciones de la industria de los conteníos.
La Llei Sinde ye ineficaz. Nun s’arima a una reforma integral de la lexislación de propiedá intelectual, l’únicu camín pa favorecer la xusta retribución de los creadores y artistes nel marcu d'una sociedá de cultura dixital. Entá asina, pese a la oposición d'una parte importante de la sociedá incluyendo creadores y artistes, PSOE, PP y CiU votaron a favor d'ella. Pesaron más les presiones de gobiernos estranxeros y de grupos minoritarios que l'interés social. Pero nun too ye culpa de los nuesos representantes: nós escoyímoslos, por aición u omisión.
Dende Nolesvotes.com consideramos que PSOE, PP y CiU faltaron a la so principal obligación cola ciudadanía: defender la Constitución que xuraron o prometieron acatar. La Llei Sinde somete Internet a una lexislación esceicional, con un gran amenorgamientu nos derechos a la llibertá d'espresión ya información y a la proteición xudicial efeutiva, faciendo posible un mayor control políticu na rede.
La to decisión ye perimportante. Nun te pidimos el votu pa nengún partíu concretu, nin que votes en blancu, nin que t’astengas, sinón que t’informes pa comprobar qu'esisten alternatives contraries a la Llei Sinde en tol espectru ideolóxicu. Pidímoste que defiendas la llibertá na rede col to votu, nun sofitando naquellos que colos sos actos fixéronse claramente merecedores d'un votu de castigu.
El próximu 22 de mayu, NUN LOS VOTES.
